TN Colleges Closed தமிழகத்தில் கல்லூரிகளுக்கு விடுமுறை? அரசு முக்கிய ஆலோசனை

கொரோனா பாதிப்பை கருத்தில் கொண்டு கல்லூரி மாணவர்களுக்கும் விடுமுறை வழங்குவது குறித்து ஆலோசிக்கப்பட்டு வருவதாக தகவல்கள் வெளியாகியுள்ளன

          தமிழகத்தில் கொரோனா பரவல் காரணமாக மூடப்பட்ட கல்வி நிறுவனங்கள் படிப்படியாக திறக்கப்பட்டு வருகின்றன. முதற்கட்டமாக கடந்த ஆண்டு டிசம்பர் மாத மத்தியில் இறுதியாண்டு கல்லூரி மாணவர்களுக்கு நேரடி வகுப்புகள் தொடங்கப்பட்டன. அதன் பின்னர் கல்லூரிகளில் பெரிதளவில் கொரோனா பரவல் உறுதி செய்யப்படாத காரணத்தால் பிப்ரவரி 8ஆம் தேதி முதல் முதல், இரண்டாம் ஆண்டு மாணவர்களுக்கும் கல்லூரிகளை திறக்க அரசு அனுமதி வழங்கியது.
     

           இதனிடையே, தமிழகத்தில் கொரோனா தொற்று மீண்டும் வேகமாக பரவி வருகிறது. சென்னை, திண்டுக்கல் உள்ளிட்ட சில மாவட்ட பள்ளி மாணவர்களும், ஆசிரியர்களும் கொரோனாவால் பாதிக்கப்பட்டனர். இதனால் மாணவர்களின் நலன் கருதி தமிழக அரசு வரும் மார்ச் 22ம் தேதி முதல் 9 முதல் 11ம் வகுப்பு மாணவர்களுக்கு பள்ளிகள் விடுமுறை அளித்து உத்தரவிட்டு உள்ளது. ஆனால், 12ஆம் வகுப்பு மாணவர்களுக்கு மட்டும் வகுப்புகள் தொடரும் எனவும் தமிழக அரசு தெரிவித்துள்ளது.

          இந்நிலையில் கல்லூரி மாணவர்கள் சிலர் கொரோனவால் பாதிக்கப்பட்டு உள்ளனர். திருப்பத்தூர் மாவட்டத்தில் உள்ள தனியார் கல்லூரியில் பயிலும் மாணவர்கள், பேராசிரியர் உட்பட 4 பேருக்கு கொரோனா தொற்று உறுதி செய்யப்பட்டு உள்ளது. இதனால் பெற்றோர்கள் அச்சம் அடைந்துள்ளனர். எனவே, பள்ளிகளை போன்று கல்லூரிகளுக்கும் விடுமுறை அளிக்க வேண்டும் என்ற கோரிக்கை எழுந்துள்ளது.

         இதனைத் தொடர்ந்து, கொரோனா பாதிப்பை கருத்தில் கொண்டு கல்லூரி மாணவர்களுக்கும் விடுமுறை வழங்குவது குறித்து தமிழக அரசு ஆலோசித்து வருவதாக தகவல்கள் வெளியாகியுள்ளன. பள்ளிகளுக்கு விடுமுறை அளித்த நிலையில் கல்லூரிகளுக்கும் விடுமுறை அளிக்க தமிழக அரசு பரிசீலித்து வருவதாகவும், விரைவில் இது தொடர்பான அதிகாரப்பூர்வ அறிவிப்பு வெளியாக வாய்ப்புள்ளதாகவும் கூறப்படுகிறது.